為尐大伯三姑四叔五舅六姨七嬸八婆平反下……
新春頭，無可避免的事，就是團年和拜年，親戚老幼聚首一堂
親戚見到適婚的後輩，拍緊拖的，通常，循例，都係嗰句“幾時結婚呀！”
若是未有對象的，都係，循例，嗰句“快尐拍拖啦”跟著加多句，介紹人俾你！
做後輩的，一定心裡暗駡“癈話！我結唔結婚或拍唔拍拖，都唔乜叉關你事啦～”
但你有無諗過，親戚同你講以上對白是最佳的選擇……
笫一，親戚其實同你唔熟。
第二，佢係俾面你哋父母，求其同你傾兩句．
第三，一年先見一次（除了紅白二事）就係要講尐無聊癈話，唔通同你講私事咩!
你想想，若是親戚同你講經濟……
而家股票跌咗咁多，人人唔多唔少都有損手……容乜易損到出血嗰個會喊出嚟！
講樓市，仲衰多兩錢重，就算現時樓價有尐回落，但很多80或90後，就算唔睇戲，唔旅遊，唔乜消費……都係買唔到囉~(除非佢係堅叻/或係佢有强家底)
一講到係無物業在手，你又覺得會被親戚標籤為“廢青”……
開另一話題……講社會現象……仲死……
現時政府所攪的基建已嚴重超支，醫療福利和退休保障的問題又多多、小學TSA已令家長叫苦連天、公共房屋的申請排晒長龍、高官及議員的不負責任的言論、最慘的是社會各階層忌嚴重分化……一陣大家政見上取態不同，初而鬧交或是繼而動武，然後不歡而散，甚至導致悲劇收場……
唔通...你想大伯三姑四叔五舅六姨七嬸八婆同你講：在金星發現輕稀土，原本的輕稀土元素，原子序數較小的是鈧Sc、釔Y和鑭La、鈰Ce、鐠Pr、釹Nd、釤Sm、銪Eu但新發現金星上的輕稀土內含罕有生物化全機能之物質可研發成為無重無色無味無體之超輕體新能源，將會嚴重影响全球產油國之經濟收益，有幾個先進國家之間為了這極其重要的戰略資源已開始了紛爭，並可能引發星球大戰，為爭奪金星之輕稀土擁有權及開發權……事實上已在地球網絡世界裡暗地裹開戰了……同你吹水吹到上太空......咩！
還是通常,循例,親戚都係嗰句“幾時結婚呀?”
你亦係,通常，循例,咁回答“搵日得間先!”
咁咪大家happy happy 過新年囉！
Celingwine
